రాచకొండ కమిషనరేట్ పరిధిలో మహిళలకు భద్రత కల్పించడంలో షీ టీమ్స్ కీలకపాత్ర పోషిస్తున్నాయని రాచకొండ సీపీ జి. సుధీర్ బాబు తెలిపారు. గత నెల రోజుల వ్యవధిలో 188 మంది మహిళలను, బాలికలను వేధించినవారిని పట్టుకున్నట్టు తెలిపారు. బస్టాండ్‌లు, మెట్రో స్టేషన్లు, మార్కెట్లు, విద్యాసంస్థలు తదితర బహిరంగ ప్రదేశాలలో మఫ్టీలో షీ టీమ్స్ డెకాయ్ ఆపరేషన్లు నిర్వహిస్తున్నాయని వివరించారు.రాచకొండ ఉమెన్ సేఫ్టీ వింగ్ ఆధ్వర్యంలో ఈవ్ టీజర్లకు రాచకొండ క్యాంప్ కార్యాలయంలో కౌన్సిలింగ్ నిర్వహించారు. 132 మంది మేజర్లు, 56 మంది మైనర్లను పట్టుకుని, వారి తల్లిదండ్రుల సమక్షంలో కౌన్సిలింగ్ ఇచ్చారు. గత నెల 1 నుండి 30 వరకు 225 ఫిర్యాదులు అందినట్లు తెలిపారు. వాటిలో 26 ఫోన్ల ద్వారా, 77 సోషల్ మీడియా ద్వారా, 122 నేరుగా వేధించిన ఘటనలుగా నమోదు అయ్యాయి. మొత్తం 14 క్రిమినల్ కేసులు, 92 పెట్టి కేసులు నమోదయ్యాయి.
- ఓ ఇంజనీరింగ్ విద్యార్థిని తన పరిచయస్తుడి నమ్మకంతో వెళ్తుండగా, అతను బలవంతంగా ఓ హోటల్‌కి తీసుకెళ్లి లైంగిక దాడికి ప్రయత్నించగా, ఆమె ప్రత్యర్థన చేసి తప్పించుకుంది. ఈ మేరకు కేసు నమోదు చేశారు.
- టెలిగ్రామ్ ద్వారా అసభ్యంగా మెసేజ్‌లు పంపిన నిందితుడిని అరెస్ట్ చేశారు.
- ప్రేమను నిరాకరించిన యువతిపై ఫోటోలను మార్ఫింగ్ చేసి బెదిరించిన నిందితుడిపై కేసు నమోదు చేశారు.
- మరో యువతిని ప్రేమించమంటూ వేధించిన వ్యక్తిని కూడా అరెస్ట్ చేశారు.
- బస్టాండ్ వద్ద న్యూసెన్స్‌కు పాల్పడిన ముగ్గురిని అదుపులోకి తీసుకొని కేసులు పెట్టారు.
అవగాహన కార్యక్రమాలు:
గత నెలలో 93 అవగాహన కార్యక్రమాలు నిర్వహించి, 17,420 మందికి మహిళా హక్కులు, చట్టాలు, జాగ్రత్తలపై అవగాహన కల్పించారు. మెట్రో రైళ్లలో డెకాయ్ ఆపరేషన్లు నిర్వహించి మహిళా కంపార్ట్‌మెంట్‌లోకి ప్రవేశించిన తొమ్మిది మంది పురుషులపై జరిమానా విధించారు.మహిళలు వేధింపులకు గురైతే వెంటనే షీ టీమ్స్ వాట్సాప్ నంబర్ 8712662111కి ఫిర్యాదు చేయాలని సూచించారు. భువనగిరి, చౌటుప్పల్, ఇబ్రాహింపట్నం, కుషాయిగూడ, ఎల్బీ నగర్, మల్కాజిగిరి, వనస్థలిపురం ప్రాంతాల షీ టీమ్స్ నంబర్లు కూడా అందుబాటులో ఉంచారు.ఈ కార్యక్రమంలో విమెన్ సేఫ్టీ వింగ్ డీసీపీ టి. ఉషా రాణి, ఇన్స్పెక్టర్లు ఎం. ముని, జె. హనుమంతు, జి. అంజయ్య, ఎస్‌ఐ రాజు తదితరులు పాల్గొన్నారు.ఇలాంటి వేధింపులపై మహిళలు భయపడకుండా స్పందించాలని అధికారులు కోరారు.
About The Author
